قصص قصيرة منوعة

السلام عليكم ورحمة الله وبركاته

يلا نبدأ باول قصة وهى
الأرنب الغضبان
كان ياماكان ياسادة ياكرام مايحلى الكلام الا بذكر نبينا محمد عليه الصلاة وأزكى السلام كان فيه زمان ارنب اسمه هارىكانت مامته كل يوم تاكله جزر لحد ماجه فى يوم ن الأيام وقال لمامته هو كل يوم جزر مامته قالتله اى حاجة موجودة عندنا ناكلها ونقول الحمد لله جه هارى مش عجبه الكلام وأخد بعضه وخرج من البيت يدور على أكل وهو ماشى فى الطريق قابل صاحبه الكلب قاله مش عندك حاجة اكلها الكلب قاله اه عندى شوية عضم تفضل كله الارنب هارى قاله لالالالالا انا مش باكل عضم وهو ماشى قابل فى طريقه القطة صديقته قالها مش عندك حاجة اكلها قالتله اه عندى شوية اللبن دول تفضل اشربه جه قالها لالالالا مش بحب اللبن وهوماشى قابل التعلب تعلوب قاله مش عندك حاجة اكلها جه تعلوب قاله انا معنديش حاجة تاكلها بس انا هاكلك انت دلوقتى وكان تعلوب هيمسك الارنب هارى لكن الارنب هارى طلع يجرى منه ورجع لبيت مامته وقالها انا اسف ياماما واكل الجزر وقال الحمد لله وبقى ياكل اى حاجة مامته تقدمها له وتوتة توتة خلصت الحدوتة

القصة الثانية النملة والفيل
كان كان ياماكان ياسادة ياكرام مايحلى الكلام الا بذكر نبينا محمد عليه الصلاة وأزكى السلام كان فيه فيل ضخم كبير وكان الفيل وحش وكل الحيوانات مش بتحبه وبتخاف منه لانه كان كل مايشوف اى حيوان يضربه وكان اى حيوان يشوفه يجرى منه قبل ماالفيل يضربه وفى يوم من الايام الفيل وهو ماشى فى الغابة داس على بيت النمل جت النملة زعقت له وقالتله ايه ده انت عملت ايه انت دمرت بيتى وقتلت اولادى وقعدت تعيط وجه الفيل بصلها باحتقار ومشى وسابها جت النملة قررت انها تتنتقم من الفيل خلت الفيل نايم وطلعت فوقه ودخلت فى ودنه الكبيرة وقعدت تقرصه والفيل يصرخ ومش عارف يخرج النملة من ودنه وفضل الفيل يجرى فى الغابة لحد ما اتخبط فى شجرة ووقع ومات وومحدش من الحيوانات زعل عليه لانه كان بيعاملهم وحش وتوتة توتة خلصت الحدوتة

القصة الثالثة الولد الكسلان
كان كان ياماكان ياسادة ياكرام مايحلى الكلام الا بذكر نبينا محمد عليه الصلاة وأزكى السلام كان في ولد كسلان اسمه صابر مكنش بيحب يروح المدرسة وكان كسلان خالص ومش بيحب يعمل حاجة وفى يوم من الأيام وهو ماشى رايح المدرسة لقى صاحبه عمر قاله تعالى ياعمر نلعب شوية عمر قاله لالالا ياصابر ياصاحبى ده وقت المدرسة مش وقت اللعب يلا بينا نروح المدرسة جه صابر سابه ومشى وهو ماشى قابل القطة قطقوطة قالها تعالى نلعب يا قطقوطة قالتله لا ياصابر انا هروح اجيب الاكل ده مش وقت لعب وهو ماشى قابل الكلب كلبوب قاله تعالى نلعب ياكلبوب قاله لا ياصابر ده مش وقت لعب كل حاجة لها وقتها وسابه ومشى جه صابر وهو ماشى لقى ولد صغير بيشتغل فى ورشة عربيات والراجل صاحب الشغل بيزعق للولد الصغير وبيشخط فيه جه صابر سأل الولد وقاله هو الراجل ده بيزعق لك ليه قاله الولد انا كنت كسلان ومش بحب اروح المدرسة وسبت المرسة واشتغلت مع الراجل ده وزى ماانت شايف كل شوية بيزعق لى جه صابر مشى وقعد يفكر ويقول يعنى انا لو مرحتش المدرسة هابقى زى الولد ده لالالالالا انا هروح مدرستى كل يوم وفعلا راح صابر مدرسته وبقى من الشطار وتوتة توتة خلصتت الحدوتة