أيام زمان كانت معظم حفلات الخطوبة والأفراح بتكون في البيوت، لكن مع تغيّر إيقاع الحياة وظهور التكنولوجيا والموضة والإبهار ظهرت استايلات جديدة للأفراح، وأصبحت الكوشة شيئا مهما وأساسيا في تجهيزات الفرح بأشكالها وألوانها المبهرة والجديدة كمان..
وعشان نرضي كل المستويات ممكن نعمل كوشة في البيت، يعني على نفس مساحة وشكل البيت نعمل كوشة زي بالضبط الكوشة اللي بتكون في الفنادق غير كمان التطور اللي حصل في باقي مستلزمات مكان الفرح.
يعني كل حاجة بنشوفها وبتعجبنا في الفنادق هتكون في البيت؛ لأن مصممي الكوشات حبوا يوصَلُوا لكل الناس، ويرضوا كل المستويات.. ده غير الأشكال التحفة في الجيرب والورود..
علشان كده عملنا حوارنا ده من داخل محلات "تاتش فلاور" لتنظيم الكوشات ومستلزمات الفرح؛ علشان نعرف الجديد في عالم الكوشات ومستلزمات ليلة العمر.
وفي البداية سألنا أ. "عصام أبو العينين" المنسّق المسئول عن محلات "تاتش فلاور"..
كلمنا عن أحدث استايلات الكوشات في أفراح صيف 2008.
الكوشة طرأ عليها تطور كبير في عام 2008 زي كوشة البليكس، وهو نوع من أنواع البلاستيك الشفاف القوي جدّاً مع الفيرفورجيه، اللي هو هيكل الكوشة، ونبدأ بعد كده ننسق الورد بشكل إبداعي.
وفيه كوشة تانية كلاسيك من قماش البوتنيه، والأرضية مرايات قديمة جدًّا، وننسق عليها الزهور بشكل فني..
وفيه كوشة كلها بليكس، ويكون فوقهم على طول ترابيزة عشاء زي دور ثاني، ودول أحدث كوشات 2008.
والعروسة بتختار الكوشة على أساس إيه؟
ده بيرجع لشخصية العروسة؛ فهي لو شخصية كلاسيك بتختار الكلاسيك الراقي السيمبل، أما لو كانت روشة بتحب الحاجات الغريبة زي الكوشات البليكس، وبتختار أماكن مفتوحة زي الفيلات والحدائق.
وازاي بتصمموا كوشات في البيوت؟
إحنا فكرنا نوصل للناس في كل مكان، واقترحنا إننا على استعداد تصميم كوشات في البيوت وأول حاجة إننا بنخصص مهندس ديكور من عندنا بيروح البيت قبل الفرح بحوالي أسبوع، وبيشوف الأماكن والمساحات، وبنفس المساحة والشكل والأثاث اللي في البيت بنعمل كوشة ونوزع الورد زي الفنادق بالضبط على الصالون ومدخل البيت، وأي أركان في الشقة ونجهز ترابيزة السفرة كأنها بوفيه مزين بالورود والشموع بشرط من غير ما نغير أي حاجة في شكل البيت وهو ده الإبداع والجمال.
إيه الجديد في تنظيم الترابيزات والكراسي؟
الترابيزات من أهم مستلزمات الفرح وإحنا بنحاول نغيّر في شكلها على حسب مكانها سواء في الفندق أو الأماكن المفتوحة وبنزينها بالورد والشمع أما شكل التنظيم فبيكون أهل العريس والعروسة مع بعض أو ممكن نعملها عرض سينما يعني الكوشة قدام والكراسي زي العرض السينمائي مرتبة ورا بعضها، وشكل الورد بيغير من شكلها، والمفارش بتكون بيضاء أو حمراء أو سوداء حسب طلب العروسة.
إيه هي موضة البوفيه؟
الموضة دلوقتي أكتر من بوفيه، فبيكون فيه 2 بوفيه واحد خاص بالعروسة، وده إحنا اقترحنا أن يكون فوقهم أو نعمله أمام الكوشة ونزينه بالورد، وبيكون غير البوفيه الخاص بالمعازيم، ويصمم بالورود والشموع.
وعلى فكرة إحنا بنصمم البوفيه دلوقتي من البليكس.
وإيه الموضه في النبكن (المناديل)؟
النبكن بنعتبرها ديكور خاص على الترابيزة، وبنحاول نغيّر من شكلها وتصميمها ونربطها بشكل فيه فن وبيغيّر كتير من شكل الترابيزات.
الورود تحفة جدّاً هل يتم استيرادها من الخارج؟
بعضها بنستوردها وبعضها بنصنّعها في مصنع خاص؛ لأن معظمها نباتات صناعية وأنا بعتبرها أساس زينة وديكور الفرح، وفيه مهندسين على مستوى عالي بينسقوا شكل الورود وأكثر الورود اللي بنستخدمها ورد الليليام - الكريز - الجوري... وأنواع ثانية كثير بألوانها على حسب طلب العروسة.
وإيه أشكال الدانس فلاور؟
فيه أشكال متطورة من الدانس فلاور منها عالية عن مستوى الترابيزات وممكن كمان تكون فوق الميه وشكلها بيكون مربع أو دائري أو مصنوع داخل حمام سباحة، وممكن تكون سلالم ومزين بالورود ووراها شاشة عرض كبيرة جدّاً، وبتعكس كل أماكن الفرح والمعازيم وعادة معظم الدانس فلاور بيكون من البليكس.
إيه الأشكال الروشة لدخول العروسين القاعة؟
أولا فيه اقتراح اسمه "الهلال والقمر" وده عبارة عن تصميم شكل الهلال والقمر في مدخل القاعة بحيث يتفتح القمر وتخرج منه العروسة ويتفتح الهلال ويخرج منه العريس، ويقابلوا بعض على باب القاعة وسط تصفيق المعازيم..
وفيه اقتراح آخر لدخول العروسين عن طريق الأسانسير وهو عبارة عن إننا بنصمم أسانسير في القاعة بحيث ينزل منه العروسين مباشرة على "الدانس فلاور" وسط تصفيق المعازيم..
وممكن يدخل قبل العروسين أطفال صغيرة لابسين أبيض من نفس شكل الكوشة أو عن طريق جهاز بخار بيملأ القاعة مع الموسيقى الأكشن لحظة الدخول، وعلى فكرة الموسيقي لها دور كبير لحظة دخول العروسين..
وإيه الجديد في الإضاءة؟
عن طريق الإضاءة ممكن نغيّر من لون القاعة يعني ممكن تكون أضواء مكونة من 12 لون في وقت واحد، ده غير إن الإضاءة تكون عالية على الكوشة وخافتة على ركن المعازيم زي العرض المسرحي بالضبط، وممكن نكتفي فقط بضوء الشموع.
إيه أحدث أشكال الجيرب؟
يعتبر الجيرب من أهم اختصاصاتنا؛ لأن الورود أساسية جدّاً في كل حاجة، وأفكار الجيرب كثيرة منها الأوفال والعشوائي حسب حجم العروسة يعني لو طويلة بتكون أوفال ولو قصيرة بيكون الجيرب قصير أو مدور، وعندنا أشكال مختلفة لورد العروسة على شعرها في جميع المناسبات وأعياد الميلاد أو فرح أو خطوبة، وبنصمِّم ونختار شكل الوردة على حسب لون شعرها وجسمها وفستانها، وبنقترح إن العروسة تأخذ من شكل الوردة على عروة الجاكت بتاع العريس كنوع من التوافق.
إيه أحدث الزفات دلوقتي؟
معظم البنات بيحبوا يقلدوا الزفات العالمية لكن أكثر الزفات المشهورة في مصر الزفة الكلاسيك وزفة الصعايدة، إلى جانب الزفات الروشة زي زفة الفراشة وعروسة البحر.
إيه أغرب وأحدث شكل في ترتيب مكان الفرح؟
أغرب وأحدث حاجة هو إن الكوشة بنصممها بأربعة كراسي و2 كنبة عشان أقرب المقربين من العروسين يكونوا جنبهم، والموضوع ده عجب ناس كتير وعليه إقبال كتير.
[img]
[/img][img]
[/img]
الرئيسية 
