ضفدوعة تتمنى ...........

السلام عليكم ورحمة الله وبركاته

كان ياما كان ياسادة ياكرام مايحلى الكلام الا بذكر نبينا محمد عليه الصلاة وازكى السلام كان فيه ضفدعة اسمها ضفدوعة وكان لها بيت على ورقة شجر فى الماء وفى يوم من الايام نزلت ضفدوعة تتمشى فى الغابة وهى ماشية شافت الحمار حوحو بيجرى ويلعب قعدت تقول يابخته ياريتنى كنت حمار علشان اجرى والعب زيه وبعد شوية شافت ضفدوعة الحمار حوحو وفيه راجل بيضربه وحوحو شايل عربية مليانة خشب وتقيلة عليه وقاعد يعيط قالت الضفدعة ضفدوعة الحمد لله انى مش حمار زى حوحو كان زمان اراجل ده بيضربى وشايلة حاجات كتير وهى ماشية شافت القرد ميمون وهو بيلعب فوق الشجر وبينتقل من شجرة للتانية قالت ضفدوعة يابخته بيلعب وبيجرى بين الشجر ميمون سمعها قعد يلعب ويتنقل من شجرة للتانية بسرعة وراح وقع على ظهره وقعد يصرح ويقول اه يا ظهرى اه الم فى ظهرى جات ضفدوعة قالت الحمد لله انى مش قرد والا كنت وقعت على ظهرى واتعورت زى ميمون وهى ماشية شافت الغزالة مها وهى بتجرى وكلها رشاقة قالت يابختك يامها رشيقة وبتجرى برحتك وبعدين شافت الاسد وهو بيجرى ناحية الغزالة مها وقعدت تنادى عليها حاسبى يامها الاسد هياكلك ومها بتجرى بس الاسد مسكها واكلها زعلت ضفدوعة على مها وقالت الحمد لله انى مش غزالة والا كان الاسد اكلنى زى مها ورجعت ضفدوعة جرى على بيتها وقالت الحمد لله انى ضفدعة الحمد لله وتوتة توتة خلصت الحدتة