وش رجعك بعد غيبة كنت غايبها
توّك تذكرت عشرتنا وماضيها
يامعذب الروح يكفي لاتعذبها
الروح فيها العذاب اللي مكفيها
من قبل تسأل جروحي وش سبايبها
اسأل عن جروح روحي من يداويها
جيت بعذر عن خطايا صعب نحسبها
من كثرها صدّق اني صرت ناسيها
تبغى تعدل سواتك لاتخربها
قصدك تكحّل ..علامك جيت تعميها
بلّ اعتذارك بموية ورد واشربها
خذها صريحة على كيفك تسميها
لعبة جديدة عليه جيت تلعبها
لا لا حبيبي على غيري تمشيها
شفت النجوم البعيدة .. يوه مااقربها
قم حبها وقتها قدرك يساويها
لك كلمتينٍ نزيف الجرح كاتبها
القصد واضح وسهلة في معانيها
جربت نار المذلة..؟ قوم جربها
نارك كوتني ودورك تنكوي فيها
شبيت نارك ولا تامن عواقبها
«النار ماتحرق الا رجل واطيها»
الرئيسية 
